江蓋世部落格

 

 20210417江蓋世演講《留乎下一代》

（Legacies for our Children）

 

                         「我的台語生涯—-台語演講夢想ti台中」(台語文講稿)

                                  --- 江蓋世 台中篤行教會20210417

 

前言：

「各位台中的鄉親，恁久無看著，大家好嗎？大家平安！」(客語)

各位台中的鄉親，大家平安！

 

有人kah我摳洗(khau-sé)，講江蓋世e台語「臭乳呆」，汰也敢來台中發表台語演講?

首先，這tioh愛感謝今仔日e主辦單位:

台灣中社羅倫木銀社長，

何春木文教基金會何敏誠董事長，以及

台中市選出來，台語質詢一流e陳柏惟立法委員，

乎我有chit e機會來遮，講出我e台語演講e夢想。

 

擱來ma感謝下面規e協辦單位：

長老教會台中中會教社部部長 篤行教會林欣成牧師

好民文化行動協會林芳如執行長

台中醫界聯盟理事長張士三醫師

最後感謝，tioh是歷史尚久e大屯區民主聯誼會，現任會長林清煇會長，

仝時，chit le聯誼會創會會長黃世殿先生，chit陣ma坐佇咱中間。

 

台中鄉親e情kah義，乎我有濟濟回憶。我e演講tioh tui遮開始。

 

我今仔日欲講e主題就是

《留乎下一代》（Legacies for our Children)(留給下一代)(北京話)

我e演講分作三段，

第一段､台北城台語流失

第二段､台中城台灣價值

第三段､東京都走向國際

 

第一段、台北城

 

我是桃園大溪出世e庄腳囝仔，父母攏是台灣人，六歲以前，我干旦會曉講台語。六歲彼年，全家搬來台北市，大漢以後，我變成講台語「臭乳呆」e台北囝仔。

我原本是一個真驚見笑，含慢講話e庄腳囝仔，我讀到建中，我tioh真痟演講，

足愛上台演講.

當年建中舉行演講比賽，分兩組，高二組與高三組，高二組是每班派出一名代表參加，高三組，自由報名參加.我高三彼年，我tioh家己報名參加高三組.

隔轉工，我去看比賽結果，

高三組放榜名單寫著..... 「高三組第一名江蓋世同學」.

後來我才知影，原來高三組e，干旦我一個人報名參加。

 

1983年，我做兵e時陣，部隊要舉行演講比賽，一位新來e代理隊長，

要我代表連隊參加，為連隊爭取好成績。

比賽那一工，我就先講一個故事來起鼓.

我講我ti台大校園裡，我kah一位生做足水e美國查某大學生開講，

我用英語自我介紹，『 My name is Chiang Kai-Shih 』，

結果，她目珠tng大蕊，tioh 回我一句話，

『My name is Mao Tze-Tung！』.

因此演講時，我擱補充講一句『我不是蔣介石』(北京話)，是伊誤會a.

 

我講完a，行一咧禮就落台，全場惦惦惦，無人鼓掌，無人咳嗽。

不過演講比賽一煞，濟濟長官，一個一個上台，公開點名批判「少尉軍官江蓋世」，

彼時陣，我親像一個無魂有體的稻草人，愣在那裏....。

我是犯tioh啥米天條大罪咧? 一位大隊輔導長，上台氣噗噗講出原因:

「江蓋世少尉!.....怎麼可以連名帶姓，直接稱呼先總統將公呢？------」

(北京話)

因為我上台講了一句「我不是蔣介石」。演講比賽結果，我得了最後一名!

 

1984年，我軍中退伍，找第一份工作，就是去作黨外雜誌食頭路.

我記得，我定定乎人嫌，我這個黨外菜鳥記者，台語「臭乳呆」.

彼陣，決心學台語，我tioh收集黨外政見演講帶，擱將台語廣播劇，kah錄落來，然後逐工帶隨身聽，經過兩年苦練，我認為我e台語已經削削叫，

會使來唸報紙a。

無想著，我1988年第一擺出國，去美國台灣同鄉會巡迴演講時，

定定聽著主持人按呢kah我介紹:

「各位，現在咱以熱烈的噗仔聲，歡迎來自台灣，勇敢e外省囝仔!...」

 

以上，就是我e第一段人生經歷

一個庄腳囝仔「台北城台語流失」a.

 

第二段、台中城

 

1991年，台灣爆發了台獨事件，當時e國民黨威權政府，將陳婉真、林永生、許龍俊、鄒武鑑kah我等五個人，收押ti台中市南屯區的台中看守所。

所以，我算起來，ma是一個帶佇南屯區e台中市民。

 

我佇看守所bat作過一場「獄中演講」。

起因是台中看守所頂頭仔，將人犯押佇籠仔內，歸個月攏不准出來運動曝日頭，這是違反聯合國世界人權條款。有一工，我愈想愈受氣，就佇牢房裡面，熊熊tioh用台語，大聲發表人權演講，造成看守所一陣滾絞，管理員就衝過來牢房，制止我台語演講....。想袂到，沒偌久，看守所頂頭突然改變了，阮e牢房鐵門打開了，阮仝舍房e人，攏會使去監所內面e籃球場，打球曝日頭a.

我熊熊拚Chit場「獄中演講」，本來心內真驚惶，我m知影我e運命會變安怎? 最後是in會讓步.  

多年後回想起來，可能有兩e原因:

 

第一原因､算我好運

m是我gau， 算我好運，我遇著一位不仝款e看守所所長.

有一擺，伊來我牢房門前開講時，伊講伊bat去美國考察獄政管理，有買一本英文版獄政管理e冊.我tioh問伊，我敢會使借伊彼本冊來研究否?

伊無躊躇，馬上講好啊! 冊就借我.

我tioh按呢，一方面關佇裡面，一方面讀彼本美國獄政管理原文冊，

家己作獄中人權考察研究。

 

第二原因､tioh 是情勢改變a.

外面風雲變色，情勢改變a，監牢外面，有濟濟e人kah阮相挺。

 

---我會記得，中央研究院李鎮源院士，「100行動聯盟」發起人，

伊來台中看阮，伊拿起話筒(uē-tâng)，kah我講三句話安慰：

「歹勢，卡忍耐咧……，阮會kah恁救出來……。」 。

伊講e這句話，沒偌久tioh變成事實！

 

---我會記得，30偌年前有一工，我kah另外一位兄弟，佇霧峰省議會大門口靜坐，推動台獨思想自由，彼天透風落大雨，有台中朋友，他giah雨傘來看我，伊講「我專工來看恁，等你靜坐結束後，請你逗陣來吃飯。」

---我會記得，當阮關佇台中看守所，有台中朋友，伊逐工為阮送食e物件，乎阮會當看到兩份報紙，報紙副刊裡面有，有我足愛看e台語文學。

 

---我擱卡會記得，1992年過年暗，有濟濟鄉親朋友，陪同政治受難者家屬，來台中看守所外面，舉辦一場圍爐活動，逐家輪流上台演講kah演唱，「針線情」「恩慕的人」「黃昏的故鄉」乎內面坐監e人。受難者家屬ti鐵窗外口te唱「你是針，我是線，針線永遠粘相偎...」，看守所內面tioh給kah你放大大聲e軍歌。

我人ti籠仔，我bat驚惶，我bat艱苦，我bat鬱卒，

但是，我想著外面有濟濟人相挺，乎我會得通提出勇氣，

熊熊獄中kah拚一場台語演講!

 

恁哪有聽人te講，台灣人民，無情無義，危險tioh走去匿？

請伊來台中!

恁哪有聽人te講，台灣人民，面對權勢，雙腳tioh跪落地？

請伊來台中!

chit段台中城e人生經歷，「追求自由，反抗威權，追求人權，認同台灣」，

這tioh是咱e「台灣價值」!

請伊來台中!

 

這tioh是第二段､我體會「台中城台灣價值」e人生經歷.

第三段、東京都

 

 1990年熱天，我飛去英國作短期研究，過海關e時， 一位英國歐吉桑海關人員，看我e護照英文名字，目睭擱看金金相我e臉，最後才問我一句

“Do you know Mao Tze-tung ?”     我是m bat 毛澤東，

但是我真想欲熟似二戰英雄，英國首相Chhio-Chhi-o(邱吉爾)。

 

有一本邱吉爾的傳記裡面寫著，英國首相是安怎準備演講稿.

二戰期間，他常常三更半夜，ti地下碉堡(phàu-luí)的指揮中心，

人佇房間內行來行去，口中唸唸有詞，不斷修改句頭，他攏用唸e，

叫秘書抄落來.伊e演講稿，非常口語，簡短有力，

m-na是一篇邏輯真嚴格e政治演講，擱親像一首押韻頭，押韻尾英語詩，

非常優美.

 

下面是邱吉爾佇二次世界大戰，1940年6月4日發表一篇足有名的

國會演講，

《阮欲佇海坪仔戰鬥》(We shall fight on the beaches)

下面，我唸規句仔，逐家聽看覓:

We shall fight on the beaches,

We shall fight on the landing grounds,

We shall fight in the fields and in the streets,

We shall fight in the hills;

阮欲佇海坪仔戰鬥，

阮欲佇登陸地戰鬥，

阮欲佇田野和街仔路戰鬥，

阮欲佇山崙戰鬥；

邱吉爾chit篇《阮欲佇海坪仔戰鬥》演講是81年前發表e，

英國人一篇經典e英語演講.

 

1863年11月19日，美國林肯總統發表一篇偉大e演講，《蓋茲堡演講》

(the Gettysburg Address )，林肯演講中講出，美國立國基本原則，

 “All men are created equal.”「人人生來平等」.

林肯這篇《蓋茲堡演講》是158年前發表e，是美國人偉大e經典e英語演講.

 

1963年8月28日，美國黑人民權運動領袖金恩博士(Dr.Martin Luther King Jr.)，伊佇華盛頓林肯紀念堂前，發表一篇尚有名e演講，

《我有一個夢想》（I Have A Dream），

伊chit篇偉大e演講，是金恩博士58年前所發表e演講稿，促成了美國國會通過《1964年民權法案》。

金恩這篇《我有一個夢想》是半世紀進前，

美國人一篇傳遍世界e經典e英語演講.

 

佇英語世界內面，邱吉爾，林肯，金恩，in e經典英語演講，

m-na是民主人權e歷史紀錄，ma是詩句優美e文學作品。

越頭看，咱台灣100 年前e經典台語演講，敢有否? 收藏佇叨位咧?

我找一位少年輩電腦專家兼台語文專家，拜託伊替我網路上找看覓。

 

結果，伊講，歹勢la，伊找攏無100 年前e台灣祖先，有啥米台語演講稿.

m擱，伊找著一份咱台灣尚古早e報紙，叫作「台南府城教會報」，

這是1885年創立， 裡面全部是用白話字寫e.

chit位少年台語文專家kah我講，「一百年前，台灣人講的台灣話，

tioh是按呢！看著白話字，tioh讀e出來!」

 

chit-ma一般美國小學生，差不多攏會曉去唸1863年，林肯總統彼篇

「蓋茲堡演講」，一個半世紀前e演講稿，chit-ma e小學生唸會出來，

tioh 是因為有英文原稿e文字紀錄。

 

咱台語演講e情形安怎咧?

100年進前，na無人發表台語演講，na無人用台語文記錄起來，

chit-ma 咱chit代，tioh 無法度唸出來！

因此，我te呼籲，台語演講，

請你講出來，留乎下一代!

 

這tioh是台灣e歷史，

這tioh是台灣e文化，

這tioh是台灣e記憶.

2000年台灣第一次政黨輪替.有數名東京都議員聯名邀請我，去東京都議會發表一場演講。chit場演講，我的主題是「台北東京新關係」。

當時，雖然我e台語「袂輪轉」，我想欲自我挑戰，決定欲用台語來演講。我就學習英國邱吉爾唸稿方式打稿，我先用喙唸北京話出來，邊仔請助理替我打字整理.煞落來，我擱將這份講稿，一句一句改作台語，我的教會羅馬字真含慢，只好有字借字，無字我就「竹竿逗菜刀」家己舞，按呢無閒規e禮拜，才完成chit篇台語演講稿.

2000年7月24日，那場演講，全場客滿，濟濟日本朋友及在日台灣人，攏來出席，台灣駐日代表處也派人，協助我當日的台語演講，全程日語翻譯.

演講會當中，我kah台腳日本聽眾講，我na聽tioh日本作曲家

瀧廉太郎(Taki rentaro)，

所寫e《荒城之月》（荒城の月／こうじょうのつき）chit首歌時，

就會想起，永過佇台灣土城坐監的那段日子。

彼時，三更半暝，鐵窗之內，舉頭看窗外e月娘，心內歡喜：

「彼呢媠e月娘！」

看著月亮，想到家己的未來，想到人世間，悲歡離合，抑擱有濟濟為理想奮鬥的人，我e心情，tioh規個放鬆a……。

我感謝日本議員朋友，in邀請我去東京都議會演講，乎我有機會，用台語，講台灣的故事，尤其是，乎咱e台語，走向國際舞台.

我bat kah一個日本好朋友，提起「東京都台語演講」chit 項e代誌，

我kah 伊講，「これが私の夢です。」(「這tioh是我e夢想.」)

以上，就是我的第三段「東京都走向國際」e人生經歷.

 

結語:

一位泰雅族原住民朋友，卡早bat tshua我盤山過嶺去伊e山頂故鄉，

伊教我安怎講泰雅爾語(Tayal)請安，

看到山頂阿公，你tioh講，「Lokah su ga yutas(阿公您好否)？」  

看到山頂阿嬤，你tioh講，「Lokah su ga yaki(阿嬤您好否)？」

原住民長輩序大in會足歡喜.

 

我chit位朋友，伊細漢時，ti學校乎人掛過「我不說方言」e狗牌仔，

chit-ma人佇山頂，na有機會，攏打拼用原住民語演講，講乎少年仔聽.

因為in 原住民母語已經嚴重流失a.

我想欲向在座e台中鄉親父老，濟濟的台語專家，以及網路上，

台灣頭到台灣尾e兄弟姊妹，kah逐家講:

 

今仔日，

講tioh 核能電廠廢水排放的安全問題，有人會曉上台講台語，

請你講出來，留乎下一代。

 

講tioh 想到賣鳳梨賣蓮霧的外銷問題，有人會曉上台講台語，

請你講出來，留乎下一代。

講tioh 買戰車買軍艦的國防問題，有人會曉上台講台語，

請你講出來，留乎下一代。

 

咱e台灣母語，原住民語也好，客語也好，台語也好，

咱chit代那是bo講出來，恐驚下一代tioh攏m知，

請你講出來，

 

留乎下一代!（Legacies for our Children）(留給下一代)(北京話).

乎咱e台灣母語，閣活起來，

留乎下一代!

 

恁仔細!感謝!